İqbal Məmmədovun qohumundan tarixçi alimə qarşı TƏXRİBAT - FOTO

78 saylı Lerik seçki dairəsindən deputatlığa namizəd İqbal Məmmədovun qardaşı oğlu Nəriman Məmmədov tarixçi alim, həmin seçki dairəsindən deputatlığa namizəd Vasif Qafarova qarşı təxribat törədib.

Pravda.az-ın xəbərinə görə, bu barədə V.Qafarov özü məlumat verib.

““Facebook” sosial şəbəkəsində "Alakbar Shahpelengli" adlı profil şəklimdən istifadə edərək, 78 saylı Lerik dairəsindəki digər namizədləri təhqir etməklə məşğuldur. Araşdırıb öyrəndim ki, "Alakbar Shahpelengli" adı ilə “Facebook”da nalayiq hərəkətlər edən bu şəxs İqbal Məmmədovun qardaşı Çingizin oğlu Nəriman Məmmədovdur. Digər namizədlərdən xahiş edirəm ki, bu cür təxribatlara uymasınlar. Mən belə bir əqidənin yiyəsi deyiləm. Belə səviyyəsiz mübarizə yolunu tutan opponentimə də xəbərdarlıq edirəm ki, bu cür təxribatlara hüquqi müstəvidə cavab verəcəyəm. Deyəsən, dövlət əleyhinə etdiyin cinayətə görə həbsdə olan 6 nəfər sənə azlıq edir” – V.Qafarov qeyd edib.

Qeyd: İ.Məmmədovun oğlu Mirhəmid Nərimanlı 2019-cu ilin avqustunda Lerik rayonunda yerləşən “Relax” istirahət mərkəzində dövlət məmurlarının döyülməsinə görə həbs edilib.

Belə ki, avqustun 16-da "Relax" istirahət mərkəzində nəzarət tədbirlərini həyata keçirmək üçün təsərrüfat subyektinə gələn Vergilər Nazirliyinin əməkdaşları burada müqavimətlə üzləşib, onlara qanuni fəaliyyətini həyata keçirlməsinə maneələr törədilib. Aparılmış izahat və məlumatlandırma tədbirlərinə, yoxlamanın keçirilməsi barədə müvafiq qərarların təqdim edilməsinə baxmayaraq, vergi əməkdaşlarının əraziyə daxil olmasına imkan verilməyib. Hadisə yerinə gəlmiş Lerik rayon Polis Şöbəsinin əməkdaşlarının, eləcə də Lerik rayon İcra Hakimiyyəti nümayəndələrinin də məsələyə müdaxiləsi müsbət nəticə verməyib, istirahət mərkəzinin vəzifəli şəxsləri kimi özünü təqdim etmiş şəxslər vergi əməkdaşları və polis işçilərinə hücum təşkil edərək onlara müxtəlif xəsarətlər yetirib, bundan başqa Vergilər Nazirliyinin xidməti istifadəsində və nazirlik əməkdaşlarının şəxsi istifadələrində olan avtomaşınlara daş parçaları ilə zədələr yetiriblər.

Həmin faktla bağlı cinayət işi başlanıb.

İş üzrə istirahət mərkəzinin təşkilati-sərəncamverici və inzibati funksiyaları yerinə yetirən vəzifəli şəxsləri - Nərimanlı Mirhəmid İqbal oğlu, Nərimanlı Orxan Çingiz oğlu, Əsgərov Pərviz Əvəzoviç, İmanov Famil Kamran oğlu, Şahverdiyev Rahim Bəhlul oğlu və Abbasov Amir Nağızadə oğlu Cinayət Məcəlləsinin 309.2 (vəzifə səlahiyyətlərini ağır nəticələrə səbəb olmaqla aşma) və 315.2-ci (hakimiyyət nümayəndələrinə həyat və sağlamlıq üçün təhlükəli olan zor tətbiq etmə) maddələri ilə təqsirləndirilən şəxs qismində cəlb olunaraq barələrində məhkəmənin qərarı ilə həbs qətimkan tədbiri seçilib.

Fotoları təqdim edirik